古人教落︰「樹德務滋，除惡務盡。」意思即係向百姓施行德惠，一定要力求普遍，清除壞人壞事則必須乾凈徹底，不留後患。政府先後DQ六名「瀆誓」議員，點知跟手又話唔會再主動DQ，斬草不除根，因住春風吹又生吖！
要知道除咗梁、游小學雞同埋「長毛」梁國雄等六人，議會內仲有好多高危分子，宣誓「加料」有之，大嗌口號有之，出動道具做騷有之，呢班友擔心下一步燒到自己嗰疊，自然驚到鼻哥窿冇肉。而一班反對派御用學者，更加係皇帝唔急急死太監，例如「佔中三丑」之一嘅戴耀廷就向政府開出多個條件，強調為表「和解誠意」，當局應該承諾唔再司法覆核議員，唔向長毛等四人追討訟費，六個議席補選分開進行；長毛直頭要求政府處理上訴時唔派人答辯，還佢哋議席，都咪話唔狼死！
正如出席「ontv東網電視」時事評論節目《正反論壇》嘅立法會議員話齋，修補撕裂還修補撕裂，政府如果為改善行政立法關係而破壞甚至犧牲法治，長遠對香港破壞只會更大。冇錯嘞，政府開口埋口「有法必依」、「法律面前人人平等」，連林鄭自己都識得講，無論行政長官抑或政府官員，都唔應該喺法治方面作出妥協。家陣同樣係宣誓不莊嚴，有啲人被告有啲人甩身，一套法律兩套標準，莫講話廣大市民唔服，「DQ六人組」死咗都唔會眼閉。
至於要求當局勝訴唔取回訟費，上訴不作抗辯等，更加係荒天下之大謬，有論者形容係對特區政府嘅政治要挾，係流氓嘅下三濫行徑，可謂一語中的。最過分嘅係，反對派議員要求補選分開進行，即使因此多使逾一億元公帑，眉頭都唔皺一下。司馬昭之心，路人皆見，呢班政棍講到尾都係議席大過天，乜鬼嘢民主自由公義人權，統統都係藉口。
正所謂樹欲靜而風不止，政府就算伸出橄欖枝，反對派上得床來掀被冚，玩嘢搞事只會變本加厲。大家有眼見，高鐵落實一地兩檢安排，合情合理合法，亦係事在必行，反對派歪理連篇，一味恐嚇市民；港府委任教育局副局長，反對派又係上綱上線，抹紅抹黑無所不用其極，想話搞「大和解」，未免太傻太天真。
冇錯，反對派有司法保護傘照住，長毛明收政治黑金都可以全身而退，而律政司又居然唔上訴，就係最佳例子，之不過DQ「瀆誓」議員唔同，有人大釋法在上，有同類案例可循，想玩包庇放生唔係話咁易，當局係時候趁勢打一場殲滅戰。
始終都係毛伯伯講得啱︰「宜將剩勇追窮寇，不可沽名學霸王。」對付敵人絕對唔可以姐手姐腳，畏首畏尾，特別係幕後金主嘅黑惡勢力，一日唔徹底肅清，香港一日唔會有運行。