近年有愈嚟愈多內地人來港旅遊、就學、就業同置業，部分更攞埋香港身份證定居，被指係本港物價樓價不斷上升嘅元兇，甚至被指濫用本港資源，要求港府加以限制。
有政黨尋日提出，建議內地當局容許港人申領內地身份證，令佢哋可以喺內地開設銀行戶口以及電子付款帳號，方便港人北上旅遊同打工，唔通有關政黨想藉此向內地進行大反攻？
原來有關建議，係建制派政黨民建聯編製嘅粵港澳大灣區發展建議書嘅其中一項提議，唔係惡搞。
該黨總共提出咗五十五項建議，除咗畀港人申領內地身份證，仲有取消香港私家車駛往內地嘅配額限制，以配合港珠澳大橋通車。
另一建議係放寬港人在內地工作一年不得超過一百八十三日、否則就要繳交內地稅項嘅規則，或者改以香港稅率來繳交內地稅項，以提高本港專業人士到大灣區發展的意欲。
該黨稍後會約見政制及內地事務局局長聶德權講解上述建議，供港府向內地提交大灣區規劃港方建議時參考。