政情：馮炳壽解畫 95年五百蚊鈔升值之謎

大中華香港收藏家協會創會會長馮炳壽話，藏品嘅價值往往係由數量來決定，好似中國銀行於一九九五年發行嘅五百蚊同一千蚊紙鈔就好渴市，其中五百蚊鈔已升值至二、三萬蚊一張，原因竟然同當年富豪付贖金嘅事件有關。

古代錢幣成收藏新寵

馮炳壽話，廿年前某富豪因需要大量現鈔繳付贖金，導致上述年份嘅紙鈔大幅減少，因此身價水漲船高。佢話，近代嘅錢幣同紀念品升值潛力大減，收藏家開始轉攻古代錢幣，南北宋嘅銅錢同滿清嘅五帝錢目前都好受歡迎，雍正時代嘅錢幣更於一年之間升值一倍。不過要收藏古代錢幣，要喺歷史文化方面做吓功課至得。

明年將辦藝術博覽會

講起收藏品，馮炳壽話佢哋明年會舉辦一個藝術及收藏品博覽會，期望大眾將屋企嘅家傳之物，如玉器古玩攞去會場公諸同好之餘，協會亦會提供免費鑑定同估價嘅服務。是次展覽嘅計劃總監胡毅超就期望藉此提升港人嘅收藏文化同藝術品味。