政情：撐摺工務人事兩小組 民記為撥款開路

小組淪拉布平台 違其原意

根據立法會《議事規則》成立嘅工務小組及人事編制小組，設立原意係讓政府提出撥款申請時，先在兩個小組委員會充分討論並獲得共識，縮減喺財委會審議嘅時間。但喺拉布風潮下，結果適得其反，反而為反對派製造拉布機會。陳健波就話，喺工務小組審議嘅項目，九成會喺財委會再討論過，變相同一撥款遭「雙重拉布」，令審議時間不減反增，與原意背道而馳。

建制派喺上屆已萌生「摺埋」工務及人事編制小組嘅念頭，但係怕反對派會為此發難，甚至拉布抗衡，為免令審議項目已堆積如山嘅財委會「塞上加塞」，故只能按兵不動。但隨着游蕙禎、梁頌恆、梁國雄、姚松炎、劉小麗及羅冠聰六人因宣誓風波而被褫奪議員資格，故一眾建制派即重提建議。

據了解，民記內部認為眼下反對派損失六人，係突襲嘅好時機，故決定「郁手」，稍後將向外表態支持建議，務求在補選出新議員之前，「摺埋」兩個小組委員會。相信身為建制派副班長嘅陳克勤屆時需負責為民記同其他建制派做穿針引線嘅工作喇！

倘成功 財會將增兩副主席

此外，據悉工務小組主席盧偉國對「摺埋」建議態度消極，堅持工務小組有存在需要。建制中人曾經建議，倘「摺埋」行動成功，財委會可設立兩位副主席，分別由盧偉國及葉劉淑儀擔任，屆時就可以安撫失去主席職位嘅盧偉國及葉劉喇！