中環出更：囡囡叫許曉暉早啲退休
民政事務局前副局長許曉暉（Florence）離開政府一個多月，但依然好關心文化發展，早前佢出席一個水墨畫展時，卓妮見佢精神唔錯。Florence笑笑口話，依家多咗好多時間陪女兒，仲會陪囡囡一齊食吓雪糕，囡囡當然好開心喇，仲笑指「早知你早啲退休喇，早啲買畀我食」，真係童言無忌。
享受退休生活嘅仲有外號「頭箍小姐」嘅財經事務及庫務局前常任秘書長區璟智，佢都同老公一齊去睇畫。
區璟智細個已學水墨畫
區璟智話，細細個已開始學水墨畫，不過被爸爸笑佢學得唔係好認真。近年佢就跟沈平老師學，不過學咗一排，呢幾年又冇時間學嘞，因為依家忙於喺非牟利機構做年輕人嘅工作。其實人生流流長，退休後做啲有意義嘅嘢都係好事。
民政事務局局長劉江華及民政局政治助理黎穎瑜（Jade）都有到場，兩人見到Florence好開心，仲搭住膊頭一齊影相添！劉江華笑指好羨慕Florence有得放假，自己就好忙，冇得放，不過佢好享受工作，呢一日抽空嚟睇畫，都係因為自己好鍾意藝術。至於Jade原本係勞工及福利局局長政治助理，過檔民政局一個幾月，唔知慣唔慣呢？Jade就話兩個局都有啲近似，所以上手都唔難。
主辦畫展嘅藝育菁英基金會主席方黃吉雯就話，今次展出嘅作品有五百多幅，生活喺香港有自由環境、濃郁文化氛圍，所以都希望以今次畫展促進中西文化交流。
卓妮