一疫未平一疫起 港府無奈蚊子何

俗語話,新官上任三把火,可惜吖,新政府上場以來,三把火就見唔到,烏煙瘴氣嘅嘢就大把,公然放生黑金政客唔在講,就連環境衞生都明顯變差,流感高峰期啱啱至過啫,又輪到蚊傳疾病蓄勢待發,怎一個亂字了得!

冇誇張o架,繼天水圍短期內爆發三宗本地日本腦炎個案後,又輪到市區接連出現登革熱確診個案,第一個患者係西九地盤工人,第二個係年輕女白領,咁啱得咁蹺二人都住喺太子區,證明毒蚊非常猖狂,新界同市區一樣唔安全,唔驚就假。

早排流感肆虐,搞到醫院人滿為患,當局要向私院借床,家陣話就話流感個案已經回落咋,但公院依然一床難求,人手依然非常緊絀,萬一日本腦炎同登革熱一齊爆發,公營醫療想唔崩潰都幾難。正如港大專家話齋,澳門多年前都試過被登革熱攻陷,中招人數多達一千四百人,搞到醫療系統不勝負荷,人哋見過鬼怕黑,一有零星個案已經如臨大敵,反觀香港仍然懶懶閒,來來去去都係加強滅蚊同舉行講座呢兩招,到底有幾大防疫作用,心照喇。

日本腦炎又好,登革熱都好,源頭都係毒蚊叮咬,而滅蚊向來由食環署負責,佢哋有幾盡責,大家有目共睹,過去唔係被揭發「蚊杯」蓉蓉爛爛,數據造假,就係連自己地方都管唔掂,搞到污糟邋遢。呢,今年五月之嘛,食環署轄下嘅紅磡市立殯儀館先至被本報踢爆天台積水及腳,雜草叢生,蚊患嚴重,簡直就係累街坊。睇到啦,食環署年年話加強滅蚊,結果年年都有蚊疫傳播,日本腦炎同登革熱幾乎成為風土病,食環署想唔認食塞米都唔得,都仲未計老鼠橫行呢一筆,連郵輪碼頭同消防學院都成為老鼠竇,你話食環署知唔知醜字點寫吖。

咁當然喇,一個巴掌拍唔響嘅,食環署固然係Hea做,但香港市民嘅公德心同樣不敢恭維。淨係睇吓每年有幾多海洋垃圾咪知囉,當中大部分都係本地棄置嘅膠樽,就連CNN都將香港海岸形容為「垃圾海」,簡直羞家。至於鬧市後巷滿布垃圾同污水,由沙士至今都冇改善,就知道唔少人從來冇吸取教訓。所以話啫,香港人成日笑內地人冇公德心,其實係五十步笑百步咋。

點都好啦,新政府上場冇耐,怕且都唔想見到香港成為疫埠啩,咁就唔該衞生官僚醒醒定定,加強滅蚊,市民亦要做好本分,咪一味貪方便污染環境。話時話,滅蚊都仲可以靠蚊油,打破黑金政客保護傘又唔知可以靠邊個呢?唔通真係要有請中央巡視組出場?