政情：徐德義 蘇敬恆爭議多 陳肇始恐孤身撲火
特區政府月初公布首批副局長、政治助理人選，當中有人上任時已備受爭議，亦有人一履新就即刻出洋相，情況可謂相當驚險！但唔好以為表面無風無浪就乜嘢問題都冇喎，有建制派議員就私下投訴新任嘅食物及衞生局副局長徐德義，話佢做聯合醫院行政總監嘅時候已擺官款，唔肯同地區人士溝通，有議員仲話徐德義見工時已同局長陳肇始講到明，話自己「唔會做lobbying（游說工作）」，若果之後嘅政治助理唔識得同班議員打好關係，陳肇始呢五年任期隨時要孤軍作戰，自己由頭打到落尾。
新政府破天荒委任由護士出身嘅陳肇始做局長，政圈已有唔少人竊竊私語，話香港從來都未出現過「護士管醫生」嘅局面。或者陳肇始早已心中有數，專登搵內科醫生徐德義做副局長，補足食衞局高層冇醫生坐鎮嘅缺失。
徐見工講數 拒游說工作
有建制派議員透露，其實徐德義早喺見工時已要求多多，大膽到同當時嘅未來老細陳肇始講明，話自己「唔會做lobbying（游說工作）」。但副局長呢個位除咗要訂定衞生政策之外，亦都要處理政府同立法會嘅關係，甚至要向議員、傳媒同公眾解釋政策，唔肯做游說工作嘅話，仲請你返嚟做乜呢？
徐德義喺二○一四年開始出任聯合醫院行政總監，任內已多次爆出醫療事故，有地區人士私下亦對徐德義有微言，批評佢以為自己高高在上，「好睇唔起我哋」，即使有地區單位想約佢傾吓醫療問題都唔肯見面，淨係識將啲溝通工作推晒畀下屬處理，完全唔明白點解陳肇始會請佢喎。
蘇意見多多 傳將任政助
至於外間盛傳電視節目主持人蘇敬恆會出任食衞局局長政治助理，有建制中人就批評蘇敬恆做論壇主持嘅時候都幾惹火，被質疑唔夠中立。唔知陳肇始搵佢做政助，係咪睇中佢做主持人意見多多，甚至可以提供另類意見畀佢呢？由於副局同政助都係新手，都要經過一輪熱身先會上手，睇怕陳肇始暫時都係要孤身作戰先嘞！