中環出更：陳浩濂做官唔辭區議員？

港府本月初公布首批副局長、政治助理名單，包括自由黨中西區區議員陳浩濂獲委任為財經事務及庫務局副局長，佢將於下周三（16日）正式上任。不過，翻查中西區區議會的網頁，截至尋日為止，陳浩濂嘅資料尚未刪除，莫非佢做官都唔辭任區議員？

陳浩濂接受查詢時話，自己上周已經遞交辭去區議員職務嘅信件，生效日期係本月十四日，佢透露，現時手頭上仍有一批居民個案要處理，近期就係着手跟進，以便完成手上個案才正式離開。資料顯示，陳浩濂辭任區議員嘅生效日期，就係佢正式履新副局長前兩日。

政府本月一日已經公布委任陳浩濂為財庫局副局長，據知月薪約為二十三萬元，由於佢獲委任後唔係即時返工，加上近半個月仍然履行區議員職務，估計佢可以按比例獲得近半個月區議員酬金，以現時區議員每月三萬多元酬金計算，即係近一萬四千元。

卓妮

中環出更：陳浩濂做官 唔辭區議員？