中環出更：父子裝禮服上陣 余壽寧搶盡風頭
城中名媛出席派對時，總會悉心打扮爭妍鬥艷，但係男士們就好難令人眼前一亮。香港商業專業評審中心會長余壽寧（Hommer）早前出席家族企業成立一百周年晚宴時，同個仔余浩興着住件一式一樣嘅鮮艷禮服，喺人頭湧湧嘅會場特別突出。Hommer笑稱當晚個個男士都着西裝，所以佢特別訂做呢款禮服兩仔爺着，話咁樣突出啲、氣派啲喎。
香港又多一間百年老店，Hommer就話唔係自己嘅功勞。當年阿爺余達莊開設「瓜菜號」起家，到父親引入多個歐美品牌而奠下良好根基。佢話可能大家覺得「誠信」好難量化，但佢哋每代掌舵人都嚴守「準時找數」嘅標準，呢啲就係誠信，台下一眾供應商同經銷商聽到都笑呵呵。
魏麗霞做零售 成年冇得抖
傳承學院榮譽主席陳裕光同家品公司主席魏麗霞（Lisa）都有到場。陳裕光話中國人成日話「富不過三代」，呢一日又誕生一個富過三代嘅經典案例。Lisa間家品公司已成立廿六年，佢笑稱都希望可以做成百年品牌。佢有感而發話，做零售好辛苦，一年三百六十五日都冇得休息，就算八號風球都要開舖，仲要應付層出不窮嘅狀況，真係少份堅持都唔得。
國貨公司後人余國春同余鵬春（PC）兄弟都去撐場，PC最近忙住周圍飛，因為佢籌備緊世界客屬懇親大會，今次係四十六年後再次由香港主辦，預計有三千人出席，難怪佢忙到氹氹轉，呻話冇時間跑機做運動喇！
同場仲有中華廠商聯合會副會長吳宏斌，問佢競逐下一屆會長嘅戰況如何，佢笑笑口話：「形勢大好！」聽落信心十足咁喎。
卓妮