政情：羨慕謝偉俊 柯仔自嘲無星味
去年首次當選立法會議員嘅民建聯柯創盛（柯仔），同身為律師嘅獨立議員謝偉俊同屬九龍東直選議員，但論及知名度，始終係出任議員近十年嘅謝偉俊稍勝一籌，柯仔話，自己雖然喺去年立法會選舉中順利贏取議席，但知名度仍然唔夠。
畀家人投訴睇電視先見到佢
柯仔仲自嘲唔及謝偉俊咁有星味，因此，即使依家係立法會休會期間，佢仍然努力工作，佢嘅日程同選舉期間都冇乜分別，連屋企人都投訴要睇電視先見到佢。
除咗將勤補拙，柯仔仲謹記前立法會議員陳鑑林教誨，喺區內舉辦受歡迎嘅活動，鞏固同開拓新票源，呢項活動就係四驅車大賽，除咗借四驅車畀參加者仲設賽道，似乎幾有規模。
柯仔又提及，活動喺討論階段時曾出現唔少質疑，但近幾場比賽見到街坊反應熱烈，仲好似有小朋友主動查詢比賽詳情，難怪佢講起比賽都一臉滿足喇！