政情：「洗一次就得」 李應生教治頭蝨
最近網上瘋傳，有兩名小朋友喺香港科學館戴過頭盔後惹上頭蝨，有傳兩名小朋友事後仲要剃光頭，本身從事中藥生意嘅中華總商會副會長李應生話，近年喺藥房已經有得賣治頭蝨嘅藥水，洗一次就可以冇事，聽到有人仲要因為頭蝨而剃頭，覺得好訝異。
食補品前最好先睇中醫
講起中藥發展，李應生話，近年出咗唔少顆粒狀嘅中藥，沖水就可以飲，相比起以前要煎藥，真係方便好多。佢又提及，一定係煎藥嘅功效最好，顆粒沖水就得番八、九成功效，但的確比較方便，揀邊一種，就大家權衡吓嘞！
依家炎炎夏日，究竟應該食啲咩補身？李應生話每個人嘅體質都唔同，好難一概而論，佢建議大家最好睇一次中醫後先決定食咩補品，咁樣就冇咁易買錯嘢嘞！