咪以為人之將死，其言也善喎，壹淫媒係就係陷入窮途末路嗰頭近，之不過生安白造、無事生非嗰鋪癮，係點戒都戒唔甩嘅。呢，話口未完又嚟嘞，今次慘被唱衰嘅係內地發展商恒大集團，搞完香港搞內地，壹淫媒有幾毒，唔使問喇。
係咁嘅，最新一期《壹週刊》又玩針對，大字標題話恒大內地部分地產項目停工，淪為死城，仲質疑其經營模式、股價及資金鏈有問題，話恒大「走上一條搖搖欲墜的鋼線」，「有機會骨牌式瓦解」喎，簡直語不驚人死不休，但事實係咪咁先？
大家都知，喺香港上市嘅恒大早排先至發出盈喜，半年純利暴升兩倍，淨係今年六月咋，合約銷售額按年大升逾九成至六百多億元人民幣，股價火箭飆升，股民眉開眼笑。仲有喎，去年底現金餘額逾三千億元人民幣，今年七月初集團更贖回全部永續債。睇到啦，一間業績亮麗、現金流充沛嘅公司，竟然被壹淫媒誣衊為「骨牌式瓦解」喎，結果搞到恒大一日之內股價大插水，市值蒸發近百億元，股民損失不菲，你話壹淫媒含血噴人，係咪為害不淺吖。
話時話，壹淫媒最鍾意打住「新聞自由」嘅幌子公器私用亂咁吠，咁多年嚟畀佢咬過嘅苦主不計其數，上至城中富豪，下至七線明星都有，甚至連清潔阿姐都唔放過，誹謗「霸王」案更係典型。今次之所以揀中恒大，除咗眼紅人哋賺到盆滿缽滿，你慌唔係又出於仇中心態咩。你知啦，物似主人形，漢奸黎逢中必反，壹淫媒造謠中傷更加係家常便飯。所以話啫，對付呢挺傳媒敗類，講道理係冇用嘅，一於告到佢破產，告到佢甩褲，告到佢摺埋，恒大話明考慮循法律途徑追究失實報道，咁就啱喇。
講到呢度，大家可能會覺得奇怪，壹淫媒明明蝕到趴街，死到臨頭，《壹週刊》員工亦就快被人「賣落妓寨」，照計應該唔好再撩是鬥非喇，點解係都要周圍辣着火頭呢？答案好簡單，天生老作難自棄囉，淫賤不能移囉。宣淫販賤同造謠誣衊不嬲係壹淫媒嘅本性，就好似狗改不了吃矢、貓改不了偷腥一樣，天性使然，死性不改，只要壹淫媒一日喺度獻世，一日只會繼續為害人間嘅咋。
真係諗極唔明，《壹週刊》宣淫販賤嘅案底厚過電話簿，誹謗罪成嘅前科仲長過阿婆塊紮腳布，咁都有人肯接貨，傳聞北大人仲有份斥資添，唔通真係嫌錢腥？咪話功夫茶唔提醒，漢奸黎個仔滿身毒瘡，流膿惡臭，邊個掂親邊個死，係都要落疊咯喎，到時賴嘢就唔好喊嘞。