政情：符傳富未有證 驚訝入立會免安檢
前日上任嘅運輸及房屋局局長政治助理符傳富（Mark），尋日就陪同運房局局長陳帆到立法會，出席同高鐵一地兩檢有關嘅內務委員會特別會議。曾經做過立法會議員助理嘅佢，對立法會大樓並唔陌生，但首次以公職人員身份到立法會令佢感到「搞笑」。
僅需登記 保安知新任政助
阿Mark尋日話因為只上任咗一日多嘅時間，所以立法會證件仍未到手，仲以為要好似訪客咁進行安檢先可入立法會大樓，但最終只需登記身份證就放行。
其實以前佢經常以訪客身份去立法會大樓，對立法會大樓嘅設施尚算熟悉，起碼知道洗手間嘅位置，再加上佢個名特別，所以唔少保安都識佢，而佢話保安已知悉佢就任政助，所以尋日冇證件到立法會，亦冇被保安誤當訪客而要求佢接受安檢。