政情：一舊雲帶老公考察惹爭議 姚思榮未收投訴
立法會工商事務委員會上月組團到以色列考察，議員鍾國斌同黃碧雲（一舊雲）因未有隨團返港，惹起公費旅遊疑雲，其中一舊雲更被揭佢老公亦有隨團。立法會議員個人利益監察委員會主席姚思榮話暫時未收到相關投訴。
姚：雖然冇違規 感覺上唔好
姚思榮尋日話海外考察前提係唔能夠用公帑資助其他人，行程安排亦唔能夠因而受到影響。基於呢兩個前提，議員攜同親友同行係唔需要作出申報，而根據目前所得嘅資料，佢認為一舊雲冇違反相關規定。佢仲話立法會目前冇規定議員唔能夠提早出發或延遲返港，若然有人涉及佔用交通、酒店等資源，則應交由當事人解釋，雖然冇違反規定，但認為感覺上唔係太好。
始終議員係用公帑考察，係咪應該收緊規定？姚思榮就話議員早去遲返、攜眷出席考察團都唔係首次發生，亦都係沿用上述相關規定去處理，但認為行管會可研究有冇修改空間，但首先視乎會唔會有人作出投訴。