政情：任總明寸鬍鬚曾 做足十年守財奴

指量入為出唔等於墨守成規

任總尋日首度開腔，喺網誌上話香港過去十年出現咗有史以來偏低嘅經濟增長，可能係大家以為只要政府盤數冇出現財赤就符合《基本法》嘅要求，佢指《基本法》第一百零七條列明，特區嘅財政預算原則要量入為出、力求收支平衡、避免赤字，預算亦要同本地生產總值的增長率相適應。但任總就話，呢一條法律並唔係具體規定，遵守「原則」唔等於墨守成規；「力求」唔排除力有不逮；「避免」亦不代表唔能夠發生。咁鬍鬚曾只係講求量入為出，擺明就係誤解《基本法》喇！

時至今日，香港已經有九千幾億港元盈餘。任總就話，就算係揸車都要留意情況，如果部車太慢就要踩油，太快就自然要收油，比喻當經濟增長太慢，政府就自然要增加開支、減稅同赤字預算；當經濟增長速度太快，就可以用相反嘅財政政策。任總講到咁，唔知係咪話鬍鬚曾用錯晒方法，亂咁揸車，累到經濟增長低，市民生活就更慘嘞！

「狼來了」嚇市民減派糖期望

睇番鬍鬚曾喺過去兩屆政府做咗十年財爺，前後寫咗九份財政預算案，年年都計錯數，低估收入、高估支出，而且相差十萬八千里，累計多年已低估咗五千幾億港元盈餘，平均每年估少六百億港元，導致庫房年年水浸。連埋佢「玩財技」而收起嘅七百幾億港元「房屋儲備金」，政府連同房委會實質可動用嘅儲備，一早已突破一萬億港元大關。

鬍鬚曾嘅理財哲學係乜？其實只係做期望管理，每當估計政府有大量盈餘、庫房水浸，佢就「狼來了」恐嚇市民，話香港好快會「結構性財赤」，政府要量入為出、審慎理財，根本就係減低市民對派糖嘅期望；於是大條道理年年舊酒新瓶，次次被鬧爆派糖係小恩小惠，兼且年復年搞埋啲一次性紓困措施，拒絕大幅增加經常性社福開支，好明顯係攬住啲錢，唔肯開倉紓困，佢名副其實係守財奴！