中環出更：廖振新馮英倫上任 唔怕廚房熱
發展局喺副局長廖振新同政助馮英倫正式上任後就「齊腳」。發展局一向處理唔少燙手山芋，佢哋係咪會擔心發展局呢個廚房太熱？馮英倫話要煮好菜就要受得熱，會「擸起衫袖做」，而廖振新就話首日返工仲未感受到溫度，但會多啲同各界溝通同互動。
馮英倫同廖振新前日履新就拍短片上載到發展局社交網站專頁。廖振新更喺短片中透露，首日返工特登揀象徵吉利嘅紅色領呔，希望日後事事順利。佢又話之前任職土木工程拓展署，負責開拓新市鎮及新發展區，過往會以技術同諮詢市民嘅方法去做，但仍然面對唔少困難，希望依家轉咗跑道，可以喺溝通協作上「做多啲」。
鍾意秋天去郊野公園
原來佢哋都有共同嗜好，就係秋涼時鍾意去郊野公園。馮英倫話香港係少有喺行山時可以睇到海景嘅地方，而廖振新話每個月都會去郊野公園同水塘等，放假時會參加「太太行山團」，同太太及好友去行山，佢又話明白市民熱衷郊野公園議題，會多留意市民意見。至於局長黃偉綸就喺片段尾聲突然「闖入」，仲話發展局「同屋企一樣齊齊整整好」。唔知三位「大廚」喺發展局呢個熱廚房會煮出乜嘢好菜呢？
卓妮