中環出更：甄韋喬山區做義工坐車飲酒壯膽
早幾日卓妮喺活動上見到願景基金會主席甄韋喬（Mickey），講起佢哋定期舉辦嘅十面埋「服」服務大賽，係鼓勵年輕人以具創意嘅方式去做義工，拒絕「交行貨」。Mickey就話佢都曾經試過有好深刻嘅義工服務經歷，當年去貴州霧川嘅山區建學校，坐吉普車途經崎嶇山路，顛簸不在話下，有半個轆仲係凌空飛咗出去，諗起都驚，驚險過坐過山車喎。
Mickey話真嘅過山車佢平時都已經唔多敢坐，去貴州嗰次仲要搭足十二個鐘，多次來回，直言真係要飲啲酒壯膽先敢坐同埋瞓得着，不過亦都因為咁，佢先練成咗去到邊都瞓到覺嘅技能喇！
莊家彬鍾意潛水睇鯊魚
菁英會主席莊家彬都有出席晚宴，講起早前美國有嘉年華嘅機動遊戲發生嚴重意外，佢就話自己怕高，加上佢唔係擔心啲樂園嘅機件故障，而係擔心有時檢查人員疏忽發現唔到有問題，所以寧願下海玩潛水都唔敢玩吊喺半空中嘅機動遊戲喎。佢話好享受潛水可以近距離睇到唔同鯊魚，有次佢就睇到十幾米長嘅鯨鯊，印象深刻。
估唔到一班男士平日喺政商界衝鋒陷陣，去到遊樂場竟然變咗負責睇手袋。驚玩機動遊戲嘅仲有勞工及福利局副局長徐英偉，佢話去親主題公園都係由老婆陪啲細路玩，佢係負責服侍佢哋嘅。不過佢畏高嘅程度喺佢入政府前有所改善，事關佢當年特登去咗參加outward bound克服跳海恐懼，所以依家叫做大膽咗。發展局政治助理馮英倫就難忘喺檳城建築物頂樓行玻璃橋，行完先知驚，笑言好彩冇訂位喺嗰度食飯，否則成晚望住個玻璃底邊食邊驚。
卓妮