有人計過數，高鐵一地兩檢如果搞唔掂，淨係營運費每個月倒緊八千萬落鹹水海，其實仲有另一條數都好襟計。香港人平均每個月丟棄超過三億個紙包飲品盒，當中大部分直入堆填區，都咪話唔誇張。
有環保團體調查發現，港人每年棄置多達三十七億個紙包飲品盒，足夠鋪滿十七個香港大球場，重量超過四萬噸。你知喇，呢啲包裝要成幾十年至可以分解，對環境造成極大污染，加上依家垃圾圍城危機迫在眉睫，前幾年港府推「三堆一爐」，出盡九牛二虎之力至拆得掂，任由紙包飲品盒係咁堆落去，點樣擴大堆填區都唔會夠用喇。
之所以搞成咁，係因為呢啲包裝當中含有膠質，唔可以當普通廢紙回收，加上仲未納入生產者責任制，生產商根本唔會主動回收。講出嚟嚇大家一跳，本港紙包飲品盒基本上係「零回收」，莫講話拍馬追唔上美國同日本嘅四成多，連內地嘅百分之十都遠遠不如，你話係咪羞家吖。
潮流興講「變廢為寶」，紙包飲品盒同樣用途多多，除咗可以製成高質素嘅紙製品，其他好似鋁及膠嘅物質，亦可以製成天花板、地板以至鍋爐燃料等，可惜政府政策跟唔上，講乜都嘥氣。例如上述環保團體就試過同學校合作回收紙包飲品盒，再無償送到日本再造，加強宣傳教育無疑用心良苦，問題係單打獨鬥效果始終有限。話時話，第時實施家居垃圾徵費，即係變相將處理成本轉嫁市民身上，政府一樣唔使上身，仲有冇再卸膊啲吖。
上述例子只係冰山一角。政府成日宣傳叫人唔好做大嘥鬼，仲係威係勢咁搞咗個「惜食香港運動」，點知原來食環署轄下公眾街市先至係浪費大戶。大家有眼睇，人哋美國紐約市政府幾年前已嚴格要求食肆減少一半廚餘；加州亦強制每年生產超過二百公噸廚餘嘅食肆進行回收，南韓多年前已立法禁止廚餘進入堆填區，唯獨香港仍停留喺民間自發階段，結果自然又係回收率輸人哋幾條街。
冇計喇，香港嘅回收工作幾十年如一日，仍然停留喺最原始「黃廢紙、藍鋁罐、啡膠樽」嘅三色桶階段。環保署舊年成立十億港元回收基金，至今只批出寥寥數千萬元，講到尾咪因為申請手續太繁複，配套資源不足囉。當然喇，講到源頭減廢，市民意識配合亦好緊要，港人平均產生嘅垃圾量居世界前列，如果唔係就唔會丟棄咁多紙包飲品盒喇！
始終都係呢句，保護環境一定要兩條腿走路，淨係官冷民熱或者官熱民冷，始終都唔係辦法！