政情：去探錫克廟長老 張國鈞變包頭族
尋日天氣又曬又熱、空氣質素又差，好多人行街都擔遮擋下太陽，或者索性留喺屋企，但立法會議員張國鈞（Horace）同班黨友身處室內，但竟然做包頭族喎，究竟搞邊科？
參與宗教儀式歎咖喱角
Horace透露，佢尋日同班黨友一齊到訪灣仔錫克廟，專程去探望錫克廟嘅長老，同佢哋傾吓偈了解吓佢哋嘅近況。佢又話其實五年前已經開始探訪錫克廟嘅少數族群，而每一次去到錫克廟都會陪長老們一齊參與宗教儀式，事前除咗要除鞋同洗腳之外，仲要用頭巾包住個頭先可以行入廟宇裏面，而佢亦已經習慣晒呢啲指定動作嘞！
今次廟宇嘅儀式完晒之後，有朋友用奶茶同咖喱角招待佢哋，所以佢哋先會包住個頭食嘢，真係夠晒印度風味！Horace仲話印度嘅文化同香港完全唔同，佢哋啲奶茶所用嘅奶比較濃郁，香料亦都用得比較多，所以唔係個個香港人都飲得慣o架！
呢間錫克廟建於一九○一年，曾喺二次大戰期間兩度遭炮火破壞，隨着教徒人數漸多，錫克廟多次重建同擴建先有依家嘅規模，Horace仲話間廟嚟緊好快又擴建，優化廟內設施。