中環出更：黃之鋒預告「重奪」羅冠聰議席？
香港眾志（眾志）主席羅冠聰早前被法庭裁定宣誓無效，喪失立法會議員資格，近日已交還立法會辦公室，即係901室。眾志秘書長黃之鋒尋日喺社交網站上載坐喺901室嘅相，話一定會重回901辦公室，相信係指眾志會有人再得到立法會議席，唔知佢係講緊羅冠聰會上訴、補選，定係黃之鋒自己會參選呢？黃之鋒又預告，會連結八國青年抗爭領袖，又會進行國會游說和參與聽證等。唔通即係打算「唱衰香港」？
會去外國游說 繼續唱衰香港
黃之鋒話自己喺交還辦公室時，諗起從未喺呢間辦公室影過相，就急忙影咗呢張相。佢話失去議席對眾志嘅資源造成嚴重打擊，失業亦帶嚟沉重壓力，聘請職員同保留地區辦事處仍係未知之數，但眾志仍會繼續公民社會嘅工作，又預告會有多項抗爭，包括策動運動反對一地兩檢同國民教育，表明會落區打「民意戰」。
唔單止咁，佢仲預告會壯大「亞洲民主青年網絡」，連結八國青年抗爭領袖，又會進行國會游說和參與聽證等。咁快就講明會繼續去外國國會，相信又係要再次「唱衰香港」喇！
卓妮