中環出更：曾陷事業低潮 文立慶幸有結婚
創業之路好多時都未必一帆風順，早前卓妮見到第一線集團創辦人及行政總裁文立，佢話當年讀書時已開始創業，當然有經歷過最痛苦嘅時刻啦，○二年科網股開始爆嘅時候，佢公司因負債要不斷同人傾債務重組嘅問題，可以話係佢事業嘅黑暗期，慶幸當時佢亦選擇咗結婚，減少咗唔少煩惱。
文立話「修身，齊家，治國，平天下」係有道理嘅，當年喺佢事業最痛苦嘅時期，好在佢結咗婚，皆因如果仲係女朋友就會詐型問點解唔陪佢行街睇戲食飯，但結咗婚就唔同喇，太太知道佢冇錢，三更半夜都全力支持佢，所以佢先可以好放心專注喺工作上同埋有動力捱過呢段艱難時期。
李根泰創業初期都失敗咗六次
經營眾籌及網貸平台嘅李根泰就話創業最緊要不外乎幾樣嘢，就係興趣、能力、金錢同埋前景。佢初期創業都試過失敗咗六次，當時對行業及市場脈搏認識都唔深，做落先發現自己期望同能力有出入，感覺挫敗，後來先發現其實係寶貴經驗。佢試過首創揸車去人哋門口做借貸，又試過做網購生意但因時機未到而失敗，因為嗰時仲未普及，相反依家做網購情況就好唔同嘞！
前海管理局香港事務首席聯絡官洪為民、香港青年創業家協會前會長陳龍盛搞網上士多Ztore首席執行官岑廸贊呢日為一個創業比賽擔任評判。洪為民諗起當年做IT寫程式好快已經有生意，算係頗順利，但就好似一個技術人員咁創咗業都唔識管理，一味創完又賣創完又賣，又唔願成日返國內，到後來先搵到識營運嘅夥伴合作管理，所以創業成功都要靠部分運氣o架！
卓妮