天下本無事，政客自擾之。廣深港高鐵香港段落實「一地兩檢」，明明係便民出行嘅措施，外國亦早有先例，奈何部分人逢中必反，左一句「割地賣港」，右一句「跨境執法」，反對派更揚言拉布「抗爭」，分分鐘又係好事多磨。
上述政治謊言，連日來唔少有識之士已經駁斥過，功夫茶喺度就唔多費唇舌，有啲人講到冇嘢好講，於是轉移戰線，質疑高鐵香港段落實「一地兩檢」，係就係大大縮短通行時間，但實際需求未必合乎預期，到時千億元工程盞淪為大白象工程。咁啱得咁蹺，有媒體引述政府預測數據，港府一五年對高鐵乘客中嘅香港居民估算，比○九年減少二百萬人次，至於商務客，更加比原先少四百萬人次，令所謂「大白象」論者更加振振有辭。
正如運房局官員話齋，話明估算，只供參考，實際乘客量有幾多，仲要睇過至知。再講吖，大型基建嘅經濟效益，冇番二、三十年都講唔埋，好似當年起地鐵，夠有好多人反對喇，到依家咪又係成為市民生活不可或缺一部分。
不妨聽吓旅遊業界人士點講吖，高鐵香港段連通內地二萬多公里高鐵網絡，到時全國遊客直接坐高鐵訪港，相關從業員收入同就業機會亦會相應增加。冇錯嘞，家陣內地豪客荷包腫脹，各國奉為財神爺，香港高鐵只要分到當中一小部分，已經獲益匪淺。
當然喇，高鐵無論點樣便利都好，始終都係硬件，軟件唔配合都係嘥氣。過去幾年大家有眼睇，喺別有用心人士挑動下，中港矛盾日益熾烈，唔係「驅蝗」就係「光復」，當正內地旅客殺父仇人咁款，係人都怕怕。最弊係港府應對無力，疏導無方之餘，反而聽咗激進分子支笛，將一簽多行改為一周一行，帶頭嫌錢腥，結果有着數都無福消受。
撇開政治唔講，香港素來以「購物天堂」、「貨真價實」招牌吸引內地客，可惜近年強迫購物等劏客、辱罵旅客醜聞頻傳，搞到香港個朵臭晒。就最近之嘛，有不肖業界人士打住「三百元遊港澳慶祝香港回歸二十周年」旗號招搖撞騙，二百名南京長者慘墮強迫購物陷阱，有人客被禁錮兼破財十幾萬。照咁睇嚟，高鐵香港拍烏蠅未必杞人憂天，只不過係自己趕客，與人無尤咁解嘅啫。
始終都係領導人講得啱︰蘇州過後冇艇搭。今時今日內地經濟飛速發展，不知幾多國家希望坐上中國發展嘅快車，香港近水樓台，唔使買飛、唔使排隊，國家早就留咗好位，可謂恨死隔籬，天予弗取，未來只有被邊緣化嘅命運！