政情：八網難逃：推銷裸買 大嘥鬼又抽水

網民笑稱「紅都面晒」

大嘥鬼喺社交網站專頁上載咗一張自己喺地鐵站內冇着衫，淨係拎住一個印有「裸」字環保購物袋遮住重要部位嘅照片。原來大嘥鬼係抽裸男水宣傳「裸買」，真係百厭。

大嘥鬼喺社交網站上留言話︰「鬼鬼想邀請大家一齊裸呀」，唔好以為大嘥鬼曳曳，其實大嘥鬼只係想邀請大家參加呢兩日於太平山街舉行嘅裸買活動，鼓勵大家購物時自備環保袋，體驗減廢生活，「裸住咁買嘢」。有網民就大讚大嘥鬼「好抽得」，亦有人大玩潮語，話見到大嘥鬼裸體「紅都面晒」喎！

（互聯網）