政情：林超英 梁美芬 齊聲反對船灣建屋
香港大學都市實驗室科斯產權研究中心日前建議，將全港第二大嘅水塘、船灣淡水湖填平以發展新市鎮。建議一出，即引起各界熱議，不過似乎狂插嘅人比較多。前天文台台長林超英尋日就出言反駁，話水資源嘅重要性高於一切，直言如果冇水飲，有屋住都冇用；連平時好少關注呢啲議題嘅立法會議員梁美芬都話，若然填湖成真，將會組織「護湖」行動添！
尋日林超英同填湖建議嘅研究者之一、港大房地產及建設系講座教授鄒廣榮一齊上電台節目，一場舌戰在所難免。鄒廣榮話有關諗法只係拋磚引玉，強調水塘本身就係破壞自然生態嘅建設，而且香港唔少新增人口都係居住喺填海所得嘅土地，加上政府需要大量土地儲備以應付樓市波動，所以先考慮填平船灣淡水湖。
「如果冇水飲 有屋住都冇用」
林超英就形容有關建議係噩夢。佢話淡水湖有重要作用，因為東江水會暫存於淡水湖，而非即時進入香港嘅食水供應系統。若然出現旱災，淡水湖就能夠提供食水緩衝，而毋須完全依賴內地供水咁話。佢仲話，世界各地都十分注意水資源安全問題，應該將水嘅重要性放最高，並確保儲存足夠嘅水資源，如果冇水飲，有屋住都冇用喎！
不過，林超英都承認，淡水湖嘅生態價值較低，但就有康樂價值，反建議各界考慮有唔少平原地嘅香港北部去建屋喎。林超英作為環保人士，有咁嘅睇法就不足為奇，但估唔到本身係法律學者嘅梁美芬竟然都有類似睇法。
發展局：歡迎天馬行空建議
佢話如果真係填平船灣淡水湖去建屋，佢會組織護湖行動添！點解咁激？原來佢以前讀中文大學時，就經常去船灣淡水湖玩樂同踩單車，後來結婚生仔，亦都經常趁周末帶個仔去玩。有咁珍貴嘅回憶，又難怪佢會咁激動喇！
填湖議題鬧得熱烘烘，發展局局長黃偉綸都無得避，佢尋日就話現屆政府有意成立專家小組以協助覓地，但人選就仍然未定，只稱會邀請專業人士咁話。另外，佢又話歡迎任何有助解決土地不足問題嘅意見，即使係天馬行空嘅建議都歡迎喎！點解聽落好似有弦外之音，批評緊呢個填湖建議咁嘅？