中環出更：未婚陳肇始 抱B有一手
食物及衞生局局長陳肇始未結婚，但原來抱B有一手！陳肇始尋日出席國際母乳哺育周慶祝活動，現場有好多小朋友同媽媽。開場前，佢同一眾小朋友影相留念，大會仲安排一位媽媽將一名初生BB畀佢抱。好多女士見到條頸仲未硬嘅BB都怕怕，但係現場所見，陳肇始抱B嘅手勢都幾熟練，真係估佢唔到。
護士出身 手勢正確
陳肇始接咗個BB之後就用左手抱實，右手仲豎起手勢影大合照，不過佢就好緊張咁望實BB，影完相即刻用右手扶正BB嘅頭，仲用左手捉實BB大髀。一直熟睡嘅紅衫BB由頭到尾都冇醒過，睇嚟陳肇始都抱得幾正確。可能因為佢係護士出身，就算自己未生過，都知點樣抱BB喇！
陳肇始一直支持以母乳餵哺BB，佢鼓勵母親持續餵哺，特別係初生嬰兒，應持續餵母乳最少六個月，最緊要係媽媽嘅堅持。佢又話，依家已有八成七母親選擇母乳餵哺，舊年伊利沙伯醫院仲成為「愛嬰醫院」添！
卓妮