中環出更：唔識炒米粉福建女仔會嫁唔出？
香港住咗唔少福建人，沙田區議員黃冰芬（Iris）同葵青區議員郭芙蓉（Jody）就係福建人喇，佢哋早前仲一齊出席一個福建嘅同鄉會活動添。佢哋兩個聚埋一齊，就講起福建家鄉菜，原來有傳福建嘅女仔要識得炒米粉先至可以嫁得出，Jody仲話佢細細個已經要跟媽咪學炒米粉喇。唔通Jody媽咪咁早就擔心個女嫁唔出？
Iris同Jody兩人都來自福建，Iris家鄉就喺莆田，Jody就喺仙游縣。兩人講起福建傳統，就話佢哋好多女仔都要煮得一手好菜，甚至有人話福建女仔要識得炒米粉先至嫁得出。Jody仲自爆自己細細個嗰陣真係要跟媽咪學炒米粉，不過佢就始終覺得炒得唔夠媽咪咁好。至於Iris，佢就話依家已經唔使喇喎。不過佢哋兩個都話自己好鍾意食福建特色菜，其中最鍾意嘅就係滷麵，仲話每次食都會諗起媽媽親手煮嘅味道。
黃自強推介炎夏食土筍凍
當日活動其實係香港莆仙同鄉聯合會第八屆理監事就職典禮，會長黃自強、常務副會長林志明及經營福建菜餐館多年嘅方志忠都有出席。黃自強話，香港嘅福建菜唔係好多，好似土筍凍咁，凍冰冰，食落透心涼，啱晒夏天食，不過依家識整嘅人就愈嚟愈少。佢仲話，土筍凍入面嘅沙蟲其實洗得好乾淨，食落味道唔錯咁話。
好多人都誤以為莆田菜同新加坡有關，方志忠就話，其實只係因為福建有好多新加坡華僑，後來大家去到新加坡都會食到莆田菜，久而久之啲人就以為莆田菜係新加坡菜式喇。
講咗咁耐食嘢，Iris最後就話，其實除咗食嘢之外，福建建築一樣好特別，好似紅磚古厝咁，而好多屋嘅構造都係兩邊對稱，就連房間數目都係，不過裏面就可能係住咗兩家人。而Jody亦都推介仙游縣嘅九鯉湖，話係國家AAAA級景區，真係好靚o架喎。
卓妮