港府日前公布「一地兩檢」方案，逢中必反嘅爛果報雞乸咁大隻字話係「閹割」，漢奸黎個老死李漢奸仲話係「自己閹自己」添，簡直語不驚人誓不休。其實講到閹割呢家嘢咯喎，又邊有人及得上漢奸黎咁清楚箇中滋味吖。
呢嗱嗱嗱，壹淫媒繼出售《壹週刊》等雜誌後，尋日又宣布摺埋有二十年歷史嘅《飲食男女》，話就話保留網上版，其實即係苟延殘喘啫。自《爽報》爽死，壹淫媒旗下出版物摺吓一本，摺吓又一本，幾乎未停過，漢奸黎名副其實自己閹自己，家陣基本上得番份爛果報喺度獻世吊吊揈，都唔捱得幾耐嘅咋，倒不如引刀成一快，總好過捱完一刀又一刀咁痛苦喇，吓話？
係人都知，閹人因為生理異於常人，往往心理極度不平衡，爛果報之所以陰陽怪氣，唯恐天下不亂，連便民利民嘅高鐵通關安排都要全面抹黑，家陣知點解啦。咁當然，如果大家有睇過經典港產片《中國最後一個太監》，就知道呢個世界真係有人為咗榮華富貴而鍾意自閹嘅，正如漢奸黎同壹淫媒咁，以反中亂港為己任，早就賣咗屁股畀外部勢力，過去的確要風得風，要雨得雨，殊不知天道好還，惡有惡報，漢奸黎同佢個淫媒集團近年江河日下，唔止蝕到趴街，收受其黑金嘅政客亦逐個收檔，加上外部勢力又閂水喉，終於搞到連仔都要插上草標出售咁折墮，漢奸黎成為香港最後一個太監係爭遲早嘅啫。
即係咁，漢奸黎呢條契弟鍾意揮刀自宮，冇人可以阻止，但做閹豎又好，做契弟又好，做得出就唔怕認，偏偏漢奸黎一味死撐，仲厚顏無恥到搵洋助手撰文自吹，話賣仔決定同《鄧寇克大行動》一樣，留得青山在，不怕無柴燒喎，正宗跌咗落地揦番拃沙。好心啦，明明係自己陷入窮途末路，一心諗住擸錢走佬，將員工「賣落妓寨」，仲要講到日後反攻咁偉大，擺明呃鬼食豆腐啫，家陣漢奸黎恨人民幣恨到現晒形，你估仲有冇人信佢係民主鬥士呢？最怕個仔最終賣唔成，大減價都冇人吼，咁就唔止畀人笑死，最後又係畀自己爽死咋。
所以話啫，凡事太盡，緣分亦必早盡。壹淫媒呢廿幾年來搞風搞雨，煽風點火，自己玩死自己都冇人可憐。最好笑係漢奸黎嗰封契弟自白書，話咩「香港歷史將載有《壹週刊》的一頁」喎，扮晒蟹咁款，係呀，秦檜、吳三桂、汪精衞等統統史上留名o架，家陣壹淫媒即將翻完反中亂港嘅歷史一頁，功夫茶代表全港市民講句：好行夾唔送吖！