政情：吳文華未雨綢繆 打造80歲的家
唔少人都會未雨綢繆，為自己嘅退休生活打算，立法會前秘書長吳文華（Pauline）亦唔例外。卸下議會工作後專注搞社企及長者資訊網上平台嘅佢，舊年年底就花八十萬港元將寓所大裝修，改成長者友善嘅家居，聲言要為二十年後嘅需要嚟裝修：「六十歲整定，八十歲拆就容易。」
Pauline尋日接受立法會前議員劉慧卿嘅訪問，講到自己屋企已二十年冇裝修，因為其網站需要介紹方便長者嘅家居通用設施，但一般網上圖片都係外國家居嘅圖片，除咗涉及版權問題，外國家居較大，設施亦唔一定符合香港細小家居嘅設計，所以索性裝修自己屋企，到時拍相，甚至拍短片都冇問題喇！
變成歐陸風格嘅長者家居
長者家居有乜嘢要注意？Pauline發現好多年輕設計師設計時都唔會顧及長者需要，所以佢要親力親為，包括改建洗手間地台去水位、廁所加扶手、剷平地上壆位、拆牆等都要佢提點去做。佢又話咁樣嘅裝修一般嘅費用要五十萬至六十萬港元，但因為佢鍾意去旅行，亦唔想寓所現在就好似醫院咁，所以裝修成歐陸風格，結果花咗八十萬港元。