政情：姚松炎填氹發窮惡 反向立會索顧問費

考慮以「按勞計酬」形式提民事訴訟

四人今日交還辦公室後，理論上應該議員薪津都要回水，但到底四人要還幾多錢，到依家都仲係未知之數，需要立法會行政管理委員會商討處理。不過，早排立法會主席梁君彥話因為法律程序未完結，加上政府又未刊憲，所以覺得唔急於一時處理。

姚松炎尋日接受傳媒訪問時，指行管會如果最後決定向佢追討薪津嘅話，佢會考慮以合約法中嘅「按勞計酬」形式，透過民事訴訟，向立法會進行反追討自己喺出任議員嘅九個月中所提供嘅專業顧問服務。

至於三百萬元又點計出嚟？姚松炎解釋，係根據佢嘅市場價格去計算，而佢以前喺大學嘅顧問服務，收費大約係一個鐘頭二千蚊，而佢出任議員約九個月嘅時間。咁樣計下計下，佢就估計若自己反追討立法會，對方需要賠償約三百萬至四百萬元。

曾要求梁君彥就議員覆核案供援助

其實姚松炎都唔係第一次想拖立法會落水，喺舊年年底政府入稟就四人嘅立法會議員資格提出司法覆核時，當時佢曾去信梁君彥，指自己係已宣誓嘅立法會議員，要求對方就案件提供援助，包括分擔律師費同訟費，但事後就冇晒聲氣，不了了之，好明顯梁君彥唔睬佢。

為咗做議員，姚松炎連本身大學副教授份工都辭埋，應該諗住係做全職議員，而議員每個月仲有近十萬元薪酬，被取消議員資格就要向立法會回水，又要周圍籌旗填筆龐大嘅訴訟費，面臨破產危機，佢竟然諗住反索顧問費，睇嚟佢當議員份工係兼職，依家擺明係發窮惡，反咬立法會攞錢去填氹喇！

另外，四人尋日繼續執拾辦公室，當中只有梁國雄表明會上訴，而姚松炎就話唔傾向上訴，但佢同劉小麗都唔排除參與補選。諗都諗到喇，事關梁國雄上訴最有可能攞到法援，其他都驚輸到甩褲呀！