中環出更：財會應戰 波哥食雙倍血壓藥
立法會財務委員會喺上周三舉行本立法年度最後一次會議，混亂中僅通過教育新資源同三間醫院工程撥款，主席陳健波（波哥）自爆當日「食咗雙倍血壓藥先主持會議」，又鬧爆民主派「得三分鐘都仲搞我，即係以全民為敵！」波哥火氣十足似乎十月復會連任財委會主席無懸念，但佢竟然話唔想再做主席，但佢補充依家係「打大仗」，佢會當仁不讓喎。
每項撥款所耗時間倍增
財委會最後一次會議有多項議程未及審議，波哥總結過去一年工作，話合共開咗六十四次會議，大約用咗一百二十三小時，批出廿九項財務建議，涉款七百三十一億元工務及非工務工程；此外，本年度每項撥款平均要花四點二小時，比上年度嘅兩小時多出超過一倍。
此外，議員單係提出中止待續或休會議案就花咗十六小時，佔會議時間一成三；表決係咪處理臨時動議就花咗十二小時，佔會議時間一成，至於處理縮短表決鐘響時間亦花咗五個半小時。
波哥尋日喺記者會上列舉一系列數據，其實旨在提出理由為四招抗拉布修改議事程序「背書」，包括建議取消容許議員提出休會議案，但就保留可以提出中止待續等。佢否認建議係「大石責死蟹」，強調只係「優化程序」，又揚言「就算不斷簽名、譴責我，我都唔會驚！」
卓妮