中環出更：陳勇派福袋有心得
仁濟醫院董事局一眾成員早前拉隊去沙田耀安邨派愛心福袋，新界社團聯會理事長陳勇同沙田區議會主席何厚祥等地區人士都去派埋一份。講起收福袋嘅經驗，何厚祥話佢細個喺教會學校讀書，當時整體社會貧窮，佢都試過收「福盒」，入邊有間尺、奶粉等，好開心。陳勇就話福袋入邊裝啲乜嘢要好小心，提防長者錯將洗衣粉當麵粉喎。
陳勇咁講，唔通試過發生意外？佢笑笑口話冇，只係試過派麵粉時，有長者問係咪洗衣粉，所以有熱心義工提醒，如果福袋以食物為主，就唔好撈埋其他清潔劑，以免長者將洗衣粉當麵粉。佢又話以前派福袋都係公公婆婆自己落嚟攞，但依家就有大批義工派上門，盛讚義工對長者嘅關照無微不至。
孫蔡吐媚有份捐薑茶
今次係仁濟連續第九年派愛心福袋，不過就係第一次到沙田。仁濟主席嚴徐玉珊、副主席馮卓能、總理孫蔡吐媚（Mary）同鄭李華熙（Winnie）等人都有到場。Mary都擺咗啲愛心入福袋，佢捐贈咗朋友生產嘅薑茶，因為長者飲多啲薑茶，血氣夠，身體自然會好啲。
現場仲有一大班青春無敵嘅仁濟海外學生會成員，其中主席鄭晉龍係Winnie嘅仔。Winnie話個仔九月將去英國升讀大學，所以趁暑假期間幫手義賣籌款同做探訪，籌款成績都唔錯。嚴徐玉珊就話睇住鄭晉龍大，咁啱今年係仁濟成立五十周年嘅金禧大日子，梗要叫佢幫吓手喇！
卓妮