以前鬍鬚曾做財爺嗰陣，估錯數錯到離題萬丈，年年財政預算變財政失算，雖然佢老哥已經告老歸田，但港產官僚「斷估冇辛苦」嘅精神依然長存，天文台預測颱風幾乎次次失準，搞到怨聲載道，就係當中表表者嘞。
好似啱啱過去嘅颱風「洛克」咁，天文台呢頭話未有耐打到嚟，點知尋日朝早九點二十分掛出八號強風信號，跟手下晝一點二十分改掛三號波，為時只有四粒鐘咁大把，應驗咗黃子華棟篤笑嗰句「人又打風，你又打風，你打得嗰幾粒鐘！我打邊爐都打得耐過你。」
本來呢，天有不測之風雲，颶風來去匆匆，一啲都唔出奇，之不過睇番今次呢個八號波，港九新界基本上風平浪靜，樹葉都唔見吹多片落嚟，橫睇掂睇都唔似打大風。最過分嘅係，全港八個測風站錄得嘅風力，居然冇一個達到強風或烈風指標，掛八號波好明顯係「法國大餐──多舊魚」。
咁就難怪市民質疑天文台做騷多於一切嘞。尋日星期日冇股市，市民本身又唔使返工，天文台梗係可以話掛就掛，以示自己唔使睇住大商家頭做人。如果換轉平時，唔理幾大風都好，肯定拖到臨近放工至落波，打工仔逼車逼港鐵逼餐懵，多得佢哋唔少。之但係做騷還做騷，天文台今次「小題大做」，陸上、水上交通以至其他公共服務大受影響，到頭來一樣係搵着市民嚟搞。
天文台長期被指偏袒大商家，以至有所謂「李氏力場」嘅都市傳說，講到尾都係自己攞嚟。大家有眼見，天文台預測失誤多過食飯，最經典係○六年颱風「派比安」襲港，風力勁到連貨櫃都吹冧，人哋澳門一早掛八號波，香港就堅持掛三號波，結果險象環生。事後天文台畀人踢爆原來一直墨守成規，淨係根據維港風速決定颱風級數。天文台為咗補鑊，喺全港設立八個測風站，今次「洛克」一役證明又係形同虛設。又試過全港落狗屎，多區雨量達黑雨水平，天文台冇你咁好氣，堅持發出黃色暴雨警告信號。公信力蕩然，陰謀論自然滿天飛。
話時話，今時今日科學昌明，天文台又有超級電腦幫手，預測天氣照計唔難，點解次次都搞到一鑊泡？即使退一步講，天文台班官真係能力不濟，連掛幾號風球都舉棋不定，至少應該聽吓市民意見，喺三號同八號風球之間恢復設立「五號波」，等大家早作防風準備都好吖。
黃台之瓜，何堪再摘，香港社會紛紛擾擾，爭拗多多，已經夠晒煩，唔該天文台咪再添煩添亂。學似胡適話齋︰「有幾分證據說幾分話。」跟足科學數據做嘢，咁咪天下太平囉！