政情：長毛 劉小麗交還議辦 羅冠聰「私舖」焗捱租

以我哋所見，長毛喺公共屋邨兩個辦事處嘅門牌同通告大部分已遮蓋「立法會議員」或「議員」字眼，只有新翠邨辦事處正門上方嘅顯眼招牌仍顯示「長毛梁國雄立法會議員辦事處」。

長毛話未收到房屋署收回辦事處嘅要求。而劉小麗就唔知好彩定唔好彩，好彩嘅係議辦仍未開始營運，就失去咗議員資格，估計損失有限。至於原屬功能界別建築界嘅姚松炎就冇喺地區設立辦事處，比起其餘三人可以話係少咗一個煩惱。

或未能申領結束津貼

再講，立法會議員喺任期屆滿、正常離任時，可向立法會秘書處申領結束辦事處嘅津貼，以支付議員助理嘅遣散費，惟DQ四人組係被法庭裁定喪失立法會議員資格，佢哋能否申領結束辦事處嘅津貼仍屬未知之數。倘四人無法取得立法會津貼，就須自掏腰包負責，勢再添四人嘅財政壓力。