政情：唔連任教委會主席？ 蔣麗芸以退為進
立法會財務委員會早前討論政府提出嘅三十六億元教育新資源撥款申請，身兼教育事務委員會主席嘅立法會議員蔣麗芸（阿Ann）喺會上發言時就感慨喺呢一屆會期，委員會浪費咗好多時間討論個別一、兩項議程，但就甚少討論檢討教育政策嘅問題，甚至開腔話「下一屆無論係邊個做主席，我覺得（討論檢討教育政策）都係必要嘅」，聽到佢咁講，唔通佢想退下火線唔再擔任主席？咁到咗十月復會之時，分分鐘又會掀起另一場委員會主席爭奪戰！
話說喺啱啱過去嘅立法年度，會期一開始，泛民建制兩派就已經喺各個委員會「冧友」，務求要搶奪各個委員會嘅正副主席，增加佢哋嘅政治影響力。而不嬲就關注開教育議題嘅阿Ann，當時就以二十六票擊敗只得十三票嘅教育界議員葉建源，順利當選教育事務委員會主席。
話就話做咗主席，但一向惹火嘅阿Ann主持會議嘅手法就不時被泛民議員批評。最經典嗰次係委員會討論緊小三全港性系統評估（TSA）嘅時候，阿Ann多次打斷泛民議員發言，要求佢哋「望住我講嘢」，甚至指摘唔望住佢嘅議員「冇家教」，令到會議進程一度緊張起嚟。佢甚至曾經喺大會為時任教育局局長吳克儉（吳得掂）護航，話即使大家覺得國民教育有問題「咁唔推咪唔推囉，你使唔使炒咗佢呀！」甚至有人覺得阿Ann出任委員會主席，目的都不過係要幫吳得掂擋箭。
稱願意退出換會內大和解
如今教育局已經換咗新嘅局長，相信都唔使阿Ann出嚟做爛頭蟀幫手護航，連佢都講到明，若佢嘅退出可以換來委員會內得到大和解，佢亦樂於離開。咁講法，莫非泛民又可以爭番呢個主席位？
被問到佢離開委員會有冇得促成和解嘅時候，阿Ann就即刻反問「你話得唔得吖嗱？」佢又話教育係佢一直好關心嘅議題，下一屆都會繼續加入教育事務委員會喎。至於想唔想連任主席，佢就話要大家投票時先知道，仲話「反正係唔係陳志全嗰啲都唔會投我！」咦？唔通佢之前所講嘅只係「以退為進」？大家要睇吓後續發展嘞！