漢奸黎自打嘴巴出賣旗下業務，求仁得仁做足一世契弟唔在講，仲將一群為佢賣命嘅伙記「賣落妓寨」，結果梗係畀人兜口兜面問候娘親喇，點不知佢老哥不以為恥反以為榮，自吹「賣仔莫摸頭」喎，折墮得嚟咁高調，真係人間極品。
嗱，漢奸黎尋日喺《壹週刊》撰文為自己辯護，除咗認做契弟係「不可逆轉的宿命」，仲誇張到話壹淫媒冇廣告收入係受到「環顧全球」所未見嘅杯葛制裁喎，即係姓賴啫。咁都未夠喉，佢又自誇「二十七年來為香港人不平而鳴」同埋「歷史將在我們的一邊」，無恥者無敵，唔到你唔服o架。
講到歷史咯喎，唔單止唔會企喺漢奸淫媒嘅一邊，反而只會將佢哋釘上歷史恥辱柱。係人都知，壹淫媒呢二十七年來好事冇做過一件，反中亂港、宣淫販賤就不遺餘力，引入狗仔隊揭人陰私不特止，仲衰到老作新聞屈得就屈，簡直係傳媒界嘅敗類。大家有眼睇，漢奸黎回歸前幫肥彭搞破壞埋地雷，回歸後引外部勢力入關，卒之將香港搞到立立亂，由策劃七一遊行到推倒政改，由操縱議會選舉到干預特首選舉，由鼓吹佔中到煽動港獨，有邊一次冇漢奸黎同壹淫媒嘅身影吖？翻手作雲覆手雨，怕且大漢奸汪精衞翻生都自嘆不如，被讀者同廣告商唾棄又有乜出奇。
話時話，漢奸黎違法證據確鑿，人盡皆知，之但係當局遲遲唔將佢落鑊，請問天理何在，法治何存？呢嗱嗱嗱，尋日又有多個團體示威，要求將漢奸黎繩之以法，唔少立法會議員亦紛紛質疑當局刻意放生，呢啲咪叫眾怒難犯咯。又唔怪得大家咁激動嘅，佔中落幕三年都嚟緊，漢奸黎唔止毫髮無損，甚至有大把時間賣仔套現，為捲鋪蓋走佬做好準備，港府好似有晒默契咁款，隻眼開隻眼閉。反中亂港有運行，漢奸走狗有錢途，話漢奸黎冇保護傘都冇人信喇。
最諷刺係，特首林鄭月娥開口埋口法治唔會妥協，律政司司長袁國強仲走去前宗主國吹噓「一國兩制」成功落實，其實講乜都假，睇吓一班牛鬼蛇神氣燄咁囂張，就知「一國兩制」走樣變形，成功個鬼。講到尾，港府「懼外症」病入膏肓，司法刀把子又牢牢掌握喺洋奴餘孽手裏，漢奸黎外有洋人撐腰，內有餘孽呼應，仲唔有恃無恐咩。
真係諗極唔明，港府老虎屁股唔敢摸，就連狐假虎威嘅狐狸屁股都唔敢摸，驚咗狐狸騷定怕佢生臭狐？國家領導人強調以法治國，以法治港，港府帶頭破壞法治，即係同中央玩對抗嘅咋。