政情：陳健波話驚葉建源心臟病發

立法會財務委員會尋日下晝續會審議教育新資源撥款，財務委員會主席陳健波決定「劃線」要求議員作最後一輪提問，期間有民主派議員提出加會審議，陳健波反指如該議員書面承諾唔拉布，議員會願意回立法會開會，又話︰「再搞就表決唔到」，認為議員「唔想教育界議員葉建源心臟病發」就唔好拖延。

但陳健波嘅言論就令到部分民主派議員不滿，有議員指陳健波言論唔妥，質疑係咪日後審批社會福利界撥款時又會指社會福利界議員邵家臻會心臟病發。

陳健波最後收回言論，但就話現時仍有十名議員排隊輪候問題，仲有八項議員提交嘅臨時動議，擔心尋日未能就教育撥款進行表決。唔知期待撥款獲通過嘅葉建源當時聽到陳健波「溫馨提示」後，會唔會因擔心唔能夠通過撥款而心跳加速呢？之不過，就算係心跳加速都係一陣啫，事關撥款最後都獲得通過，佢終於可以放下心頭大石喇！