中環出更：莫乃光料任下年度民主派召集人
昔日叫「飯盒會」嘅民主派溝通平台，自今屆立法會起易名為「民主派會議」，並且由最資深嘅民主黨（白鴿黨）涂謹申（阿涂）做召集人。一年過去，民主派決定立法會暑假之後輪換召集人，由專業議政派出資訊科技界議員莫乃光（Charles）出任，過去Charles都較少出任民主派重要工作，唔知佢今次可唔可以勝任呢？
各黨輪流做一年
據了解，民主派會議初步討論咗輪換召集人安排，繼白鴿黨之後，專業議政同公民黨（公文袋）將會每個黨派派人做一年，而未來一年就會由Charles出任。由於唔同民主派議員將面對政府或市民入稟覆核議員資格，議席或者有改變，第四年由邊個做就要按當時形勢再決定。但Charles本人就話，要等十月立法會復會先有最後決定。
不過，今屆立法會開鑼之後，傳統溫和泛民同激進泛民曾經多次出現分歧，加上近日有六人被取消議員資格，兩派人喺抗爭手法同行政、立法關係上嘅分歧就更加嚴重。究竟從來無做過召集人嘅Charles，上任之後能否團結各黨派，就要拭目以待喇！
卓妮