康文署轄下救生員一再發起工業行動，再唔係就野貓式抗爭，郁啲就病，郁啲就唔返工，早就搞到神憎鬼厭，之但係最根本問題喺邊度呢？咪就係港府窩囊無能被人欺囉，你試吓炒多幾件，睇吓仲有冇人敢玩嘢吖嗱！
民政事務局數字顯示，一四至一六年間，康文署救生員共發起三十六次工業行動導致泳池及泳灘關閉，因為救生員臨時缺勤而關閉泳池設施更多達三十八次，即係一年平均二十四次，三年共七十四次，都咪話唔誇張。再睇番個趨勢，一四年有二十九次工業行動，一五年係零，去年就有七次，其餘關池都係因為臨時缺勤，即係話救生員連事先張揚嘅工業行動都嫌唔過癮，即興野貓式請病假先至好玩，問你點頂。
拯溺員工會爭取改善待遇，本來無可厚非嘅，之不過次次搵着市民嚟搞，次次攞公眾利益做籌碼，咁就好難得到市民同情。好似屏山天水圍泳池吖，上星期又因為唔夠救生員當值而臨時關閉，家陣正值暑假旺季，市民想同陽光玩遊戲都要問准救生員咁款，仲要去到先知食閉門羹，佛都有火喇。
話時話，救生員成日呻人手不足，呻到樹葉都落，實情係點外人未必清楚，但救生員不時被踢爆開工蛇王吞泡就珍珠都冇咁真。上個月之嘛，本報先至直擊馬鞍山游泳池嘅救生員集體喺職員室開P，聽歌飲酒打邊爐講粗口瓣瓣齊，咁都叫人手不足，咪玩啦。咁當然，最經典梗係工會前主席郭紹傑，呢頭聲稱工傷請病假，嗰頭積極參與佔中，仲充當壹淫媒老闆漢奸黎嘅私家保鏢，鬼打咁精神，話冇古怪都冇人信。
做打工仔做到咁惡，怕且全港只此救生員一家，同樣情況換咗喺私人機構發生，呢啲伙記一早炒得喇。講到尾，都係康文署廢柴無能，成隻冇牙老虎咁，唔畀人恰到上心口至奇。上屆政府畀人叫做「狼」喎，其實係「羊」至真。呢，就連申訴專員公署都睇唔過眼，指條例規定政府部門員工三個月內放五日病假就要出示醫生紙，點知康文署闊佬懶理，救生員請病假冇醫生紙又得，事後拖延補上又得，加上明知有伙記詐病都唔追究，姑息養奸成咁，有人梗係有恃無恐，變本加厲喇。
呢嗱，呢啲就係同人唔同命，同遮唔同柄嘞。有打工仔為保飯碗，瘋狂加班都唔敢呻多半句，救生員就相反，奉旨有工唔返，請病假當食生菜，港府居然吹佢唔脹，咁搞法，容乜易搞出人命o架。新政府自詡「好打得」喎，係堅定流，就睇吓搞唔搞得掂救生員呢筆爛帳喇。