中環出更：日本置業唔簡單 譚健業：租酒店好過
香港人好鍾意去日本旅行，加上本地樓價高企，唔少人都有考慮喺日本置業。卓妮早前喺沙田馬場見到博愛醫院當年顧問譚健業（Patrick），佢嚟緊會去東京旅行，但就話唔會喺日本置業喎。
Patrick話雖然佢同屋企人都幾鍾意去日本旅行，但一年最多都係去得一兩次，加上佢問過喺當地置業嘅回報率其實一般，唔係特別高之餘又要長期搵人打理及清潔間屋，租畀人嘅限制亦十分多，唔係話想加租就可以隨時加，雖則話近期日本嘅Airbnb（民宿）終於通過變成合法經營，但租幾多日一樣有限制，咁多嘢要留意，所以倒不如住酒店仲方便咁話。
吳傑莊話中山樓值得投資
轉頭見到香港青年聯會前主席吳傑莊（Johnny），記得佢喺中山嘅物業早前升價不少，佢就話早兩年中山樓價狂升，近一年則因為有限購令而停咗。不過佢覺得限購令唔會永遠嘅，而中山樓價比香港仍低出一大截，居住環境唔錯又夠清幽，好多退休人士同發展商都睇中嗰度，再者中山將有基建配合，擬建地鐵半小時接駁廣州嘅珠江新城，所以覺得依然值得投資喎。
香港中華廠商聯合會永遠榮譽會長施榮懷同太太吳蕙英及女兒Charmaine都有入馬場，講起依家好多年輕一代上車都要靠父母，吳蕙英就話唔會咁快諗定幫仔女置業，等佢哋自己大個有能力供樓先，而返港放暑假嘅阿女Charmaine之後會繼續喺外國攻讀商科，暫時都會繼續選擇住喺宿舍，關於置業呢方面暫時都唔急於諗住嘅。
孔教學院院長湯恩佳呢日都難得現身，仲戴咗一條印住禮記禮運大同篇嘅領呔，非常特別。
卓妮