作家韓寒講過，呢個世界分為兩種邏輯，一種係邏輯，另一種就係中國邏輯，查實「港產官僚邏輯」一樣咁獨特，一樣咁莫測高深，分分鐘難拆解過達文西密碼！
港府日前公布《安老服務計劃方案》，建議喺城巿規劃時加入長者人口規劃，不過就被關注團體批評嚴重低估實際需要，佢哋估計到二○二六年長期照顧服務嘅需求差距將達二萬多人，到時長時間輪候同人手緊張等問題只會愈演愈烈。之所以出現咁大落差，全因《方案》假設未來長期護理服務嘅整體需求百分比按年減少百分之一。
老年人口增加，服務需求不增反減，呢啲咁深奧嘅「港產官僚邏輯」，凡夫俗子自然一頭霧水，都係有勞據講IQ高達一百六十、素有「白鴿黨大腦」之稱嘅新任勞福局局長羅致光出場解畫。佢老哥話喎，整體長期護理服務需求冇錯係會急升，但隨着長者教育水平提高，科技進步，加上政府及早識別及介入協助，未來長者健康將有所改善，《方案》中需求每年減少百分之一已屬保守估計咁話。
呢嗱，呢啲咪高智低能想當然囉！積穀防饑，提早籌劃未來嘅道理邊個唔知，好似羅局長咁每月逗幾十餅人工嘅，就話買定基金保險，進行各式投資，退休印印腳啫，但香港地好似佢老哥呢挺「人上人」只佔少數，絕大部分打工仔手停口停，冇乜積蓄，強積金得雞碎咁多，加上人均壽命愈來愈長，點捱幾十年退休生活？前排有機構調查顯示，逾半數打工仔計劃退休後復出打工，咪就係迫於無奈囉。
條數一字咁淺，整體老齡人口增加，安老服務需求水漲船高。林鄭之前形容新班子「冇驚喜但亦冇驚嚇」，羅致光又話「神童」又話同反對派有偈傾，已經係吹到神乎其神嘅fit馬，點知見識水平都係如此不堪，真係唔慌唔冇驚嚇。
當然喇，高官唔係唔識計呢啲小學生數，只不過搵藉口推卸安老責任咁解啫。大家有眼睇，長者宿位長期供不應求，每年輪候途中含恨而終嘅長者數以千計，當局唔肯增加供應，反而一味「鼓勵」市民「居家安老」、「北上安老」，正正係典型嘅卸責表現。仲有吖，香港大部分打工仔有後顧之憂，全民退保早就係全民共識，港府係都要推三推四，講到底咪就係守財奴，冷血涼薄囉！
上屆政府安老政策零雞包，愧對長者，羅局長講到明今屆政府與上屆理念一致，蕭規曹隨，唔使問阿貴，換人不換腦，換湯不換藥，搵個IQ一千六百嘅嚟搞都係嘥氣，長者都係自求多福罷啦！