政情：羅志康再出動 為中策組救火
政府要改組中央政策組，由邊個開刀呢？之前政府話搵個政務官嚟做，而呢個政務官就係民政事務局前副秘書長羅志康（Laurie），由佢擔任改組中央政策組工作小組組長。Laurie以前曾經係海難調查委員會秘書，可以算係救火隊，睇嚟政府今次都係睇中佢呢方面嘅能力，所以搵佢去中策組救火喇！
至於中策組嘅改組方向，政府話經改組後嘅中策組，將被廢除參與法定機構同政府委員會人事任命嘅權力，將負責政策研究、創新及協調，並共同審視唔同業界提出具創意嘅項目，履行政府作為政策或項目「促成者」嘅角色。
年底前要交改組方案
咁多變動，可謂千頭萬緒，唔知Laurie由邊度起首去做呢？另外，政府希望年底可以提交改組方案，剩番幾個月時間，搞唔搞得掂就要睇下佢嘅功力嘞！