政情：黃傑龍打機領悟人生道理

依家打機都可以係一個職業，唔單止電競比賽愈來愈多，早幾個月亞奧理事會更宣布電競將會成為其中一個比賽項目。稻苗學會會長黃傑龍（Simon）及菁英會委員謝嘉恩尋日出席黃大仙廣場奠基石揭幕禮，講起打機，Simon就話讀書時都沉迷過，後來發現將人生以打機嘅態度去迎戰仲好玩喎。

話說Simon係黃大仙區撲滅罪行委員會主席，而謝嘉恩就係黃大仙區青年活動委員會委員。謝嘉恩話嚟緊暑假準備喺區內搞電競節，Simon聽到就覺得可以考慮合作添！

Simon自爆讀書時喺澳洲好鍾意玩一隻文字遊戲並連線到美國，當時仲係用文字指令進行遊戲，諗番起都覺得好原始，但又好好玩喎，仲笑言揀咗個形象最差嘅職業，專用屍體作法嘅黑巫師，後來角色一死就冇咗一半經驗，而佢亦因此脫毒。

佢話雖然嘥咗啲時間，但就令佢打字快好多，事關打字稍為慢少少已經畀人殺咗喎，而最緊要係令佢領悟到其實人生都應該好似打機咁，做嘅時候出盡力，但輸咗就唔使咁上心。至於依家，佢就覺得登入名稱係黃傑龍嘅人生遊戲先最好玩嘞！