政情：劉業強「繼承」發叔封立會懶蛇之冠

首個立法年度就快結束，翻查立法會嘅出勤紀錄，截至上個禮拜六（8日），喺過去八個月，總共開咗三十二次大會，議員平均出席率達到九成有多，但劉業強同自由黨鍾國斌嘅出席率就分別只有八成四同八成七，肯定劉業強已經係大會出席率最低嘅議員。

劉：下年會安排好一啲

喺財委會方面，議員嘅整體出席率稍遜於大會，平均出席率只有七成九。劉業強喺內會嘅出席率唔夠六成，而財會至今開咗六十六次會，佢都係出席咗其中十八次，出席率得嗰兩成七，直情追到發叔貼一貼。

被發現出席率包尾，劉業強回應時就話「我以為你哋有計時添！」仲話好多關鍵性嘅會議，例如係發展事務委員會，佢有出席，佢亦都知道好多議員打完卡就會走嚟走去，但佢就唔鍾意咁做喎。

佢又透露曾計劃每個委員會都要開足八成會議，但一開始要配合建制派冧友搶位，搞到自己都兼顧唔晒所有委員會，加上財會又不停加會議，直言「如果唔係加會（我）都六成（出席率）」。佢仲話依家只係第一年啫，下年會安排好一啲喎。

四議員幾成「三料冠軍」

最勤力嘅議員，就要數身兼財委會主席嘅保險界議員陳健波、旅遊界姚思榮同民建聯周浩鼎，佢哋喺大會同內會都有百分百出席率，只係缺席過一次財委會，而人民力量陳志全喺大會同財委會都係百分百出席率，只缺席一次內會，四人差啲就係「三料冠軍」。