中環出更：傳李浩然任副局 黃之鋒又炒作
繼教聯會副主席蔡若蓮有傳將會出任教育局副局長，被外界質疑其濃厚嘅建制背景，當年組織及發起反國民教育行動嘅前學民思潮召集人、現任香港眾志秘書長黃之鋒乘機反對，而最新有傳基本法推廣督導委員會委員李浩然將出任民政事務局副局長，黃之鋒再次趁機表明反對，更火上加油，發起一人一信，希望把握機會炒熱議題。據了解，李浩然並非出任民政事務局副局長嘅人選。
新一屆政府仍未正式公布各副局長及政治助理人選，政圈流傳，李浩然將會出任民政事務局副局長一職。李浩然係清華大學法學博士，佢現時嘅公職包括基本法推廣督導委員會委員、教育局課程發展議會委員，更有指佢曾出任貴州某縣嘅副縣長。
發起一人一信博關注
立法會議員林卓廷尋日指李浩然曾出任副縣長一段長時間，加上實際工作經驗少，質疑其背景同能力，係咪能夠勝任副局長一職。而黃之鋒亦乘機撥火，批評李浩然嘅背景，若果加入民政事務局，將會喺教育體制以外，令國教捲土重來，更發起一人一信反對李浩然出任副局長。未知今次黃之鋒能否成功引起外界關注呢？
卓妮