中環出更：唔睇靚車藍國慶寧帶團交流
暑假到，又係城中名人出遊抖暑嘅旺季。早前卓妮喺一個晚宴上見到善德基金會（善德）常務副主席藍國慶，佢話原本同太太Mina獲一間老牌豪華轎車品牌邀請，今個月下旬去東京出席新車發布會，對方包埋機票同酒店，藍國慶笑言好吸引，但咁啱同第三屆「善德關愛科研青年發展計劃」嘅北京同西安航天科技考察團撞期。諗諗吓，佢都係捨棄去東京歎世界，事關陪學生北上交流嘅滿足感仲大、仲開心喎。
被視為貴賓請出埠睇靚車，唔通佢係發燒友？藍國慶笑笑口否認，講笑話可能車廠知道兩個月前佢撞爛架車，需要換車啩？講起嗰場車禍令Mina受輕傷，嘴角仲縫咗幾針，佢話Mina恢復得唔錯，但仲要休養多三個月，所以趁機留喺屋企調理身子。
董吳玲玲為推廣科研驕傲
當晚係善德主席董吳玲玲同老公董中浩請客，為名下兩匹愛駒跑出好成績慶功。咁啱當日下晝善德邀請三位中國航天員到港同百多位學生交流對談，一眾善德董事局成員忙完就移師晚宴輕鬆一下。董太盛讚學生提問好有水準，覺得好驕傲，亦印證過去兩年「善德關愛科研」工作初見成效。咁有冇計劃進一步培育香港青年做太空人？善德副主席鄭穩偉就話太空人嘅訓練過程好艱苦，擔心港青捱唔到苦喎。
善德當屆顧問莊哲猛同太太駱英英都有到場，莊哲猛笑稱終於第一次做馬主，事關善德一班好友合養嘅團體馬即將到港，難怪佢同熱愛賽馬嘅董中浩咁好傾喇！
卓妮