呢幾日城中最熱門話題，莫過於中國第一艘航母遼寧號來港。唔係講笑，有幸撲到飛嘅市民參觀過後都豎起手指公讚頂呱呱，唔少人買紀念品都買到手軟。可惜吖，有啲人逢中必反，逢中必踩，硬係要搞風搞雨，冷嘲熱諷，有人形容為「炫耀武力」、「向香港社會施壓」，漢奸黎旗下嘅「爛果報」甚至連航母「噴黑煙」、「空氣污染」都攞出嚟講，無事生非，莫此為甚！
呢嗱，內地官媒今次就鬧得啱嘞，遼寧號首次向公眾開放，香港市民成為第一批登艦嘅參觀者，好多內地沿海城市恨都恨唔到，橫睇掂睇都係喜事一件；加上遼寧號來港撞啱日本侵華「七七事變」八十周年，呢個時候竟然有人氣急敗壞，情緒失控，反映「香港作為英國殖民地歷史嘅殘片，仲未被完全送入應該去嘅歷史垃圾箱」。
冇錯嘞，香港當年割讓畀英國，正正係滿清政府積弱腐敗，畀洋人用堅船利炮夾硬打開大門嘅結果，照道理九七前英艦、美艦訪港至係地地道道「炫耀武力」，但洋奴漢奸們冇鬧過半句不特止，反而次次鬆毛鬆翼，擦鞋唯恐不及，唔係話大兵上岸購物振興香港經濟，就係專揀美女帥哥影大特寫。家陣香港早就係中國人嘅天下，中國海軍艦艇喺自己地方停泊，天經地義，洋奴漢奸反而一味喺度亂吠，爭在未話要問准美國佬先，呢啲咪就係官媒所講嘅「奇異的邏輯」囉！
至於有人話遼寧艦來港係為咗恐嚇「爭民主的港人」，就更加係得啖笑。唔理係「和理非非」嘅傳統泛民抑或口口聲聲「勇武抗爭」嘅港獨分子，通通都係鱷魚頭老襯底，咪睇班友平時講到幾兇狠，一出事即時露晒餡，好似「佔中三恥」咁，被告將官去後籌旗打官司企圖甩身，咩「公民抗命」、「違法達義」通通拋諸腦後，樣衰到冇人有。殺雞焉用牛刀，對付呢挺廢柴，解放軍駐港部隊夠照有凸，你幾時見過有人用洲際導彈打蚊o架？
當然喇，身正不怕影斜，國家軍力強大，正常一個中國人應該感到自豪至係。有啲人見到航母雄師破浪而來，嚇到腳都震，感到「被施壓」，只能說明佢哋心中有鬼。又難怪嘅，今時唔同往日，家陣中國大國崛起，早就唔係昔日任人魚肉嘅滿清政府，有人睇唔順眼一啲都唔出奇，只可以講，今次遼寧號來港就好似一塊照妖鏡，邊個嘈得最大聲最起勁嘅，邊個就係禍港大蟊賊！
「小小寰球，有幾個蒼蠅碰壁。嗡嗡叫，幾聲淒厲，幾聲抽泣」。東風壓倒西風勢所必然，洋奴漢奸唔忿氣大可自己摺埋，滾到外國抱洋人大腿，繼續搞陰謀詭計小動作，盞焦頭爛額，慘敗收場。