政情：八網難逃：尹兆堅同囝囝玩到牙都崩
立法會議員尹兆堅（肥尹）喺Facebook上載咗一幅令人不安嘅照片，就係手掌心有一粒白色米粒大小嘅顆粒，之後佢自爆其實係佢門牙嘅一截。肥尹喺Fb貼文中自嘲︰「無啦啦多撻疤…變成『無啦啦少截牙』。係咩玩法？」到底肥尹點解會崩牙？
開頭以為係米粒
肥尹接受查詢時話，尋日喺屋企同囝囝玩時因為太過肉緊，玩到咬牙切齒，突然聽到「啪」一聲，就發現右邊側面嘅門牙崩咗一截，佢囝囝開頭仲以為係米粒，知道係門牙後都好錯愕。肥尹話稍後會搵牙醫補牙，又希望最終唔使成隻牙剝喎。佢又笑言，過往喺立法會聽到部分建制派議員發言時，都會嬲到咬牙切齒，經此一役後佢就不敢喇。
