政情：蕭偉強讚唇讀芷君 翻譯好過政務官

話工作最緊要係搵到理想

蕭偉強話，曾芷君曾經翻譯過時任勞福局局長張建宗嘅網誌，當時只係被張建宗改咗兩三個字，而唔少剛畢業嘅政務官往往被張建宗改一半以上，所以張建宗當時都問係咪有同事改過先畀佢睇。可見曾芷君除咗語文水準高外，用字亦都相當細心。

原來蕭偉強個女係曾芷君嘅大學同學，今年就畢業喇。蕭偉強話自己都有提醒將要搵工嘅囡囡，工作最緊要係搵到理想，又話自己啲退休金應該夠養囡囡，所以都叫囡囡唔使擔心人工喎，真係廿四孝爸爸。

蕭偉強喺尋日活動致詞時相當親民，仲同在場嘅小朋友講可以叫佢做「伯伯」，又笑笑口話自己冇做局長已達一百八十小時，今次係以私人身份出席。竟然數住自己幾多個鐘冇做局長，睇嚟佢都相當興奮喎。