中環出更：小肥張講錯嘢 被嘲港獨司長
中國首支航空母艦遼寧號抵港，一眾政商界人士前日優先登艦參加甲板招待會，政務司司長張建宗（小肥張）都係其中之一。不過小肥張上船時懷疑過度興奮，竟然發表政治不正確言論，仲搞到被嘲為「港獨司長」，認真失禮。
小肥張前日於中環碼頭乘搭接駁船往遼寧號前就接受傳媒訪問，佢話遼寧號訪港反映國家高度重視及關顧香港，因為今次係遼寧號第一次離開國家，而第一個外訪嘅地方就係香港。
話遼寧號來港屬「外訪」
小肥張呢番說話隨即被指政治不正確，因為佢話遼寧號來港係屬於「外訪」，又話遼寧號此行係離開國家，等同將香港排除於中國之外。佢嘅言論已經喺網上引起熱議，有人話佢嘅言論係公然分裂國家，亦有人話反映政府官員人心未歸，甚至嘲諷小肥張為「港獨司長」。
小肥張作為特區政府第二把手，竟然發表政治不正確言論，呢種低級錯誤實在令人對特區政府嘅管治團隊感到憂心。
卓妮