中環出更：去柬埔寨起廁所 黃仰芳體會貧童苦況
幸福非必然呢個係老生常談嘅道理，如果有親身經歷再對外分享會更有說服力！第三屆「香港青年服務領袖獎」獎勵計劃早前舉行就職典禮暨柬埔寨海外服務之旅分享會，獎勵計劃籌委會主席黃仰芳及創會成員林思俊憶述，今次去到柬埔寨窮鄉僻壤，除咗落手落腳髹油漆外，仲幫手起廁所，深深體會貧困兒童生活嘅苦況。
獎勵計劃副主席林月萍話，今次去柬埔寨嘅地方比較落後，冇水冇電，但當地孤兒院小朋友仍然好珍惜每一個返學嘅機會，令佢體會到幸福唔係必然，而且資源對佢哋嚟講係幾咁重要。此外，佢又提及去年眾人亦曾去尼泊爾服務，之後當地發生地震，佢哋亦有籌款並跟進情況，為當地居民建防震屋，凡此種種都感受很深。
同場還有剛卸任食物及衞生局局長嘅骨科醫生高永文，佢憶述約十年前嘅四川汶川大地震後，當時每隔一段時間就要去幾日四川，為傷者進行手術及治療，見到佢哋嘅情況都非常心噏。
蔡敏思提老人服務經歷眼濕濕
一直支持獎勵計劃嘅潮州商會會董蔡敏思亦係眼淺之人，講起做老人服務嘅經歷就眼濕濕，話每個長者都希望健康同「行得、走得」，依家唔單止人口老化，仲愈來愈多年輕一代唔生小朋友，老咗唔能夠倚靠子女照顧，因此長者一定要維持行動能力。本身做開美容生意嘅蔡敏思，早前又意外發現部分儀器原來可以幫助強化肌肉，所以擺咗幾部喺老人院希望幫到啲長者咁話。
冠忠巴士集團董事鄭敬凱亦有現身今次活動，講起參加制服團隊，佢就笑言細個曾參加過童軍及交通安全隊，但佢又自爆參加咗冇幾耐就「被退出」，事關自己嘅出席率太低，而唔講唔知，佢太太都有類似經歷，又係參加過少年警訊並維持咗好短時間，不過，呢啲都係那些年嘅事情，鄭敬凱同太太依家都自發參與唔少社會服務喇！
卓妮